ЭРИДХЭ ҮБГЭН
Поэмэ
1. Арашейн хаанай зарлиг
Дэлхэйн Нэгэдэхи дайнай үе һэн гэхэ,
Дайнай шарай үзөөгүй буряадууд хэлсэхэ:
Ородоймнай хаан
Ермааниин хаантай
Дайлалдаа юм ха,
Холын тэрэ баруун тээ
Хэсүү юумэн болоно ха.
Ехын дайнһаа хаа яахан дуулдаха:
Энэ тэрэ эндэхи харуулай хасагууд
Харатай тэндэ алуулба гэлсэхэ,
Хөөрхэй, хүнэй үри адли хайратайнууд
Гэлдэн буряадууд һүзэглэн зальбарха.
Арбан зургаанай
Июль һарада
Арашейн хаанай
Иимэ зарлиг бууба,
Буряадууды һүрдүүлбэ:
Буряад-монголнууды
Реквизицеэр татаха,
Дайнай ара талада
Ажаллуулха.
Байн гэнтэ айл аймаг зониие
Бүрэг ябаган элдэб үгэ хүлгүүлбэ,
Амгалан тэнюун байдалые
Аһан һүрөөтэй болгуулба.
“Манай хаан түригдэжэ байна юм аа гү,
Буряад хүбүүды сэрэгтэ татахань гээшэ гү?”, -
Гэхэ зэргын хөөрэлдөөнүүд дэлгэрбэ,
Гайтай юумэн болохонь булта гэлдэбэ.
Худал үнэнииншье мэдэгдэхэгүй,
Хуудам үгэ ойлгогдохогүй,
Хагда ногоо зулаһан
Хабарай түймэр шэнги һэн -
Түргэнөөр ябажа эхилбэ,
Талын зониие һэрюулбэ…
